ਡਰ ਦੇ ਰਾਹੀਂ ਨਿਯੰਤਰਣ ਨਹੀਂ, ਸਗੋਂ ਪਿਆਰ ਦੇ ਰਾਹੀਂ ਅਗਵਾਈ
> “ਕਿਉਂਕਿ ਪਰਮੇਸ਼ੁਰ ਨੇ ਸਾਨੂੰ ਡਰ ਦੀ ਆਤਮਾ ਨਹੀਂ, ਸਗੋਂ ਸਮਰੱਥਾ, ਪਿਆਰ ਅਤੇ ਸੰਜਮ ਦੀ ਆਤਮਾ ਦਿੱਤੀ ਹੈ।” — 2 ਤਿਮੋਥਿਉਸ 1:7
ਤੁਹਾਡੇ ਨਾਲ ਸ਼ਾਇਦ ਕਦੇ ਅਜਿਹਾ ਹੋਇਆ ਹੋਵੇ ਕਿ ਕੋਈ ਵਿਅਕਤੀ ਆਪਣੇ ਸੁਭਾਅ ਦੇ ਕਾਰਨ ਤੁਹਾਨੂੰ ਡਰਾ ਕੇ ਰੱਖਦਾ ਹੋਵੇ। ਉਦਾਹਰਨ ਲਈ, ਜਦੋਂ ਕਿਸੇ ਨੂੰ ਗੁੱਸਾ ਆਉਂਦਾ ਹੈ ਤਾਂ ਉਹ ਹੱਦ ਤੋਂ ਪਾਰ ਹੋ ਜਾਂਦਾ ਹੈ, ਅਜੀਬ-ਅਜੀਬ ਹਰਕਤਾਂ ਕਰਦਾ ਹੈ ਜਾਂ ਇਸ ਤਰ੍ਹਾਂ ਪ੍ਰਤੀਕਿਰਿਆ ਕਰਦਾ ਹੈ ਕਿ ਉਸਦੇ ਆਲੇ-ਦੁਆਲੇ ਦੇ ਲੋਕ ਡਰਨ ਲੱਗਦੇ ਹਨ—“ਕਿਤੇ ਇਹ ਕੁਝ ਕਰ ਨਾ ਬੈਠੇ!” ਅਤੇ ਇਸ ਡਰ ਦੇ ਕਾਰਨ ਤੁਸੀਂ ਉਸਦੀ ਗੱਲ ਮੰਨਣ ਅਤੇ ਉਸਦੇ ਅਨੁਸਾਰ ਚੱਲਣ ਲੱਗਦੇ ਹੋ।
ਕਈ ਵਾਰ ਕੋਈ ਵਿਅਕਤੀ ਆਪਣੇ ਗੁੱਸੇ, ਧਮਕੀ, ਸਖ਼ਤ ਵਿਹਾਰ, ਭਾਵਨਾਤਮਕ ਦਬਾਅ ਜਾਂ ਹੋਰ ਤਰੀਕਿਆਂ ਰਾਹੀਂ ਅਜਿਹਾ ਮਾਹੌਲ ਬਣਾ ਦਿੰਦਾ ਹੈ ਕਿ ਉਸਦੇ ਆਲੇ-ਦੁਆਲੇ ਦੇ ਲੋਕ ਪਿਆਰ ਕਰਕੇ ਨਹੀਂ, ਸਗੋਂ ਡਰ ਦੇ ਕਾਰਨ ਉਸਦੀ ਗੱਲ ਮੰਨਣ ਲੱਗਦੇ ਹਨ। ਇਹ ਦੂਜਿਆਂ ਉੱਤੇ ਆਪਣਾ ਹੁਕਮ ਜਮਾਉਣ ਅਤੇ ਉਨ੍ਹਾਂ ਨੂੰ ਆਪਣੇ ਨਿਯੰਤਰਣ ਵਿੱਚ ਰੱਖਣ ਦਾ ਇੱਕ ਰੂਪ ਹੈ।
ਯਿਸੂ ਨੇ ਕਿਹਾ:
> “ਤੁਸੀਂ ਜਾਣਦੇ ਹੋ ਕਿ ਜਿਹੜੇ ਪਰਾਈਆਂ ਕੌਮਾਂ ਦੇ ਹਾਕਮ ਸਮਝੇ ਜਾਂਦੇ ਹਨ, ਉਹ ਉਨ੍ਹਾਂ ਉੱਤੇ ਹੁਕਮ ਚਲਾਉਂਦੇ ਹਨ ਅਤੇ ਉਨ੍ਹਾਂ ਦੇ ਵੱਡੇ ਉਨ੍ਹਾਂ ਉੱਤੇ ਅਧਿਕਾਰ ਜਤਾਉਂਦੇ ਹਨ।” — ਮਰਕੁਸ 10:42
ਇਹ ਗੱਲ ਸਿਰਫ਼ ਦੂਜਿਆਂ ਬਾਰੇ ਸੋਚਣ ਦੀ ਨਹੀਂ ਹੈ। ਸਾਨੂੰ ਆਪਣੇ ਅੰਦਰ ਵੀ ਝਾਤੀ ਮਾਰਨੀ ਚਾਹੀਦੀ ਹੈ। ਹੋ ਸਕਦਾ ਹੈ ਕਿ ਅਜਿਹਾ ਸੁਭਾਅ ਸਾਡੇ ਅੰਦਰ ਵੀ ਹੋਵੇ। ਹੋ ਸਕਦਾ ਹੈ ਅਸੀਂ ਕਿਸੇ ਨੂੰ ਡਰਾ ਕੇ ਆਪਣੀ ਗੱਲ ਮਨਵਾਉਂਦੇ ਹੋਈਏ, ਜਾਂ ਫਿਰ ਅਸੀਂ ਆਪ ਕਿਸੇ ਦੇ ਗੁੱਸੇ ਅਤੇ ਵਿਹਾਰ ਦੇ ਡਰ ਕਾਰਨ ਨਿਯੰਤਰਿਤ ਹੋ ਰਹੇ ਹੋਈਏ।
ਕਿਉਂਕਿ ਜਦੋਂ ਸਾਨੂੰ ਲੋਕਾਂ ਨੂੰ ਡਰਾ ਕੇ, ਦਬਾ ਕੇ ਜਾਂ ਨਿਯੰਤਰਿਤ ਕਰਕੇ ਆਪਣੀ ਗੱਲ ਮਨਵਾਉਣ ਦੀ ਲੋੜ ਮਹਿਸੂਸ ਹੁੰਦੀ ਹੈ, ਤਾਂ ਸਾਨੂੰ ਆਪਣੇ ਆਪ ਤੋਂ ਇਹ ਸਵਾਲ ਪੁੱਛਣਾ ਚਾਹੀਦਾ ਹੈ—
“ਅਸਲ ਵਿੱਚ ਮੈਂ ਕਿਸ ਦੇ ਨਿਯੰਤਰਣ ਹੇਠ ਹਾਂ?”
ਕਿਉਂਕਿ ਜਿਹੜਾ ਵਿਅਕਤੀ ਖੁਦ ਪਰਮੇਸ਼ੁਵਰ ਦੇ ਪਿਆਰ ਅਤੇ ਨਿਯੰਤਰਣ ਵਿੱਚ ਨਹੀਂ ਚੱਲਦਾ, ਉਹ ਅਕਸਰ ਕਿਸੇ ਨਾ ਕਿਸੇ ਮਨੁੱਖ ਉੱਤੇ ਆਪਣਾ ਨਿਯੰਤਰਣ ਕਾਇਮ ਕਰਨ ਦੀ ਕੋਸ਼ਿਸ਼ ਕਰਦਾ ਹੈ।
ਪਰਮੇਸ਼ੁਰ ਦਾ ਰਾਜ ਲੋਕਾਂ ਨੂੰ ਡਰਾ ਕੇ ਨਿਯੰਤਰਿਤ ਕਰਨ ਦਾ ਰਾਜ ਨਹੀਂ ਹੈ। ਇਹ ਉਹ ਰਾਜ ਹੈ ਜਿੱਥੇ ਅਗਵਾਈ ਪਿਆਰ, ਸੱਚਾਈ, ਸੇਵਾ ਅਤੇ ਆਤਮ-ਸੰਜਮ ਦੇ ਰਾਹੀਂ ਹੁੰਦੀ ਹੈ।
ਮਸੀਹ ਵਿੱਚ ਤੁਹਾਡਾ ਭਰਾ,
ਰਸੂਲ ਅਸ਼ੋਕ ਮਾਰਟਿਨ