ਸੋਮਵਾਰ // 16 ਦਸੰਬਰ 2024
ਧਰਮੀ ਉੱਤੇ ਪਰਮੇਸ਼ੁਰ ਦੀ ਸੁਰੱਖਿਆ!
“ਧਰਮੀ ਪੁਕਾਰਦਾ ਹੈ, ਅਤੇ ਯਹੋਵਾਹ ਸੁਣਦਾ ਹੈ, ਅਤੇ ਉਸਨੂੰ ਉਸ ਦੀਆਂ ਸਾਰੀਆਂ ਮੁਸੀਬਤਾਂ ਤੋਂ ਛੁਡਾਉਂਦਾ ਹੈ।” ਜ਼ਬੂਰ 34:17”
ਪ੍ਰਮੇਸ਼ਰ ਮਹਾਨ ਹੈ ਅਤੇ ਉਸਦੀ ਸੁਰੱਖਿਆ ਵੀ ਮਹਾਨ ਹੈ! ਉਸਦਾ ਹਰ ਵਚਨ ਸਾਡੇ ਜੀਵਨ ਵਿੱਚ ਸ਼ਕਤੀਸ਼ਾਲੀ ਕੰਮ ਕਰਨ ਲਈ ਕਾਫ਼ੀ ਹੈ ਅਤੇ ਉਸਦੀ ਈਸ਼ਵਰੀ ਸੁਰੱਖਿਆ ਨੂੰ ਦਰਸਾਉਂਦਾ ਹੈ। ਪਰ ਅਜਿਹਾ ਹੋਣ ਦੀ ਇੱਕੋ ਇੱਕ ਸ਼ਰਤ ਇਹ ਹੈ ਕਿ ਸਾਨੂੰ ਉਸਦੇ ਬਚਨ ਦੇ ਅਨੁਸਾਰ ਧਰਮੀ ਹੋਣਾ ਚਾਹੀਦਾ ਹੈ!
ਜ਼ਬੂਰ 34:15 ਦੇ ਅਨੁਸਾਰ – “_ਪ੍ਰਭੂ ਦੀਆਂ ਅੱਖਾਂ ਧਰਮੀਆਂ ਉੱਤੇ ਹਨ, ਅਤੇ ਉਸਦੇ ਕੰਨ ਉਹਨਾਂ ਦੀ ਦੁਹਾਈ ਵੱਲ ਲੱਗੇ ਰਹਿੰਦੇ ਹਨ”। ਜੇਕਰ ਅਸੀਂ ਧਰਮੀ ਹਾਂ, ਤਾਂ ਪ੍ਰਮੇਸ਼ਰ ਹਮੇਸ਼ਾ ਸਾਡੇ ਉੱਤੇ ਆਪਣਾ ਧਿਆਨ ਰੱਖਦਾ ਹੈ। ਜਦੋਂ ਕੋਈ ਧਰਮੀ ਵਿਅਕਤੀ ਉਸ ਨੂੰ ਪੁਕਾਰਦਾ ਹੈ, ਤਾਂ ਪਰਮੇਸ਼ੁਰ ਸੁਣਦਾ ਹੈ ਅਤੇ ਜਦੋਂ ਉਹ ਮੁਸੀਬਤ ਵਿੱਚ ਹੁੰਦਾ ਹੈ, ਪਰਮੇਸ਼ੁਰ ਉਸ ਨੂੰ ਬਚਾ ਲੈਂਦਾ ਹੈ।
ਸ੍ਰਿਸ਼ਟੀ ਵਿੱਚ ਅਜਿਹਾ ਕੁਝ ਵੀ ਨਹੀਂ ਹੈ ਜੋ ਸਾਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ। ਇਹ ਇਸ ਲਈ ਹੈ ਕਿਉਂਕਿ ਪ੍ਰਮੇਸ਼ਰ, ਜਿਸ ਨੇ ਇਸ ਸ੍ਰਿਸ਼ਟੀ ਨੂੰ ਰਚਿਆ ਹੈ, ਉਸਨੇ ਇਸ ਸਾਰੀ ਸ੍ਰਿਸ਼ਟੀ ਨੂੰ ਯਿਸੂ ਮਸੀਹ ਦੇ ਅਧਿਕਾਰ ਹੇਠ ਰੱਖਿਆ ਹੈ। ਹੁਣ ਅਸੀਂ ਯਿਸੂ ਮਸੀਹ ਦੇ ਸ਼ਕਤੀਸ਼ਾਲੀ ਨਾਮ ਵਿੱਚ ਇਸ ਸ੍ਰਿਸ਼ਟੀ ਨੂੰ ਜੋ ਵੀ ਹੁਕਮ ਦਿੰਦੇ ਹਾਂ, ਇਹ ਸਾਡੇ ਹੁਕਮ ਨੂੰ ਸੁਣੇਗੀ ਅਤੇ ਮੰਨੇਗੀ।
ਪਰ ਪਰਮੇਸ਼ੁਰ ਵੱਲੋਂ ਸੁਰੱਖਿਆ ਦੇ ਵਾਅਦੇ ਸਿਰਫ਼ ਧਰਮੀ ਵਿਅਕਤੀ ਲਈ ਹਨ, ਦੁਸ਼ਟਾਂ ਲਈ ਨਹੀਂ। ਜਿਵੇਂ ਕਿ ਕਹਾਉਤਾਂ 28:1 ਵਿੱਚ ਲਿਖਿਆ ਹੈ – “ਦੁਸ਼ਟ ਉਦੋਂ ਵੀ ਭੱਜਦੇ ਹਨ ਜਦੋਂ ਕੋਈ ਉਨ੍ਹਾਂ ਦਾ ਪਿੱਛਾ ਨਾ ਕਰ ਰਿਹਾ ਹੋਵੇ, ਪਰ ਧਰਮੀ ਜਵਾਨ ਸ਼ੇਰਾਂ ਵਾਂਗ ਦ੍ਰਿੜ੍ਹ ਰਹਿੰਦੇ ਹਨ।” ਇਸ ਆਇਤ ਅਨੁਸਾਰ, ਧਰਮੀ ਲਈ ਪਰਮੇਸ਼ੁਰ ਦੀ ਰੱਖਿਆ ਦਲੇਰੀ ਪੈਦਾ ਕਰਦੀ ਹੈ, ਪਰ ਦੁਸ਼ਟ ਵਿਅਕਤੀ ਦੇ ਅੰਦਰ ਸਿਰਫ਼ ਡਰ ਪਾਇਆ ਜਾਂਦਾ ਹੈ। ਸੋ ਆਓ, ਆਪਣੇ ਆਪ ਨੂੰ ਪਰਖੀਏ ਕਿ ਅਸੀਂ ਧਰਮੀ ਹਾਂ ਜਾਂ ਨਹੀਂ!
ਮਸੀਹ ਵਿੱਚ ਤੁਹਾਡਾ ਭਰਾ,
ਰਸੂਲ ਅਸ਼ੋਕ ਮਾਰਟਿਨ